རྡ་སའི་ཆར་དུས།
གནས་མཆོག་རྡ་རམ་ས་ལ་ཡི། །
དབྱར་གནམ་འདི་ནི་འགྱུར་སླ་བས།།
སྐྱེས་བུ་སུ་ཞིག་ཡིན་ཀྱང་རུང་། །
དེ་ཉིད་དཔོག་པར་དཀའ་བར་གྱུར། །
ད་ལྟ་ཨ་སྔོན་གཡའ་དག་ལ། །
ཁྲི་གདུགས་ཉི་ཟེར་འཕྲོ་བས་ན། །
འཛིན་མའི་ཁྱོན་གྱི་སྐྱེ་དངོས་ཀུན། །
སྲེག་གམ་སྙམ་པ་བྱེད་ན་ཡང་། །
ཡུད་ཙམ་ཞིག་ནས་གློ་བུར་དུ། །
གནམ་ས་གཡོ་བའི་འབྲུག་སྒྲ་དང་། །
གྱ་གྱུའི་གློག་དམར་འཁྱུག་ནས་ནི། །
ཆར་པ་དྲག་ཏུ་བབས་པ་ན། །
ལམ་ཟུར་ཉལ་འགྲོས་བརྟོལ་བ་ཡི།།
ཤག་ཤག་རྒྱུག་པའི་སྒྲ་རླབས་ལས།།
མི་ཚོགས་འདུ་འཛིའི་ཁོར་མོ་ཡུག།
སྐད་ཅིག་ཉིད་ལ་ལྷིང་འཇགས་ཐོབ། །
No comments:
Post a Comment